BAO la dakika 89 alilolifunga kiungo wa Yanga, Feisal Salum ‘Fei Toto’ lilizua shangwe na kujikuta akivamiwa na mashabiki wa timu hiyo na kuanza kumwagiwa noti.
Tukio hilo la aina yake lilitokea dakika chache baada ya mchezo wa Ligi Kuu Bara kumalizika kwa Yanga kuifunga KMC bao 1-0 lililofungwa na Fei Toto kwa faulo nje kidogo ya 18 baada ya mshambuliaji wa timu hiyo Mkongomani, Heritier Makambo kuchezewa vibaya na beki, Ally Ally.
Bao hilo lilizua shangwe kubwa kwenye Uwanja wa Taifa jijini Dar es Salaam kutokana na kukosa nafasi zaidi ya nne za wazi za kufunga kwa dakika zote walizocheza huku wakigongesha miamba mara tatu.
Fei Toto akiwa anatoka uwanjani hapo, ndiyo mashabiki wa Yanga walimvamia na kuanza kummwagia hizo zinazokadiriwa kufikia zaidi ya 300,000 kama pongezi baada ya bao hilo alilolifunga kiufundi mbele ya kipa mkongwe, Juma Kaseja.
Akiwa anaelekea kwenye vyumba vya kubadilishia nguo, kiungo huyo alikutana na mashabiki wengine waliokuwa wanamsubiria kwa kumpongeza baada ya kufunga bao hilo muhimu kwa kumpatia fedha akiwa chini ya uangalizi wa makomandoo wa timu hiyo.
Aidha, bao hilo la Fei Toto nusura lipoteze uhai wa shabiki wa Yanga aliyekuwa anatoka nje baada ya kukata tamaa ya kupata bao kutokana na kelele za bao alizozisikia akiwa getini akitoka nje kwa kupewa taarifa timu hiyo imeshinda.
Shabiki huyo aliyejulikana kwa jina moja la Hassan, alishindwa kujizuia na kujikuta akianguka chini na kupoteza fahamu kabla ya wauguzi wa huduma ya kwanza kumfuata na kumbeba na machela na kumpeleka kwenye vyumba uwanjani hapo kwa ajili ya kumpa matibabu.
Akizungumzia bao hilo Fei Toto alisema: “Ni bao langu la kwanza kulifunga katika msimu huu wa ligi, hivyo ni mwanzo wangu mzuri katika msimu huu wa ligi.
“Bao hili ninaamini litakuwa limenitoa nuksi na kuendelea kufunga mabao zaidi katika michezo mingine ya ligi inayofuata, niwashukuru Wanayanga kwa sapoti yao na zawadi hii ya fedha waliyonipatia wakumbuke nipo Yanga kwa ajili yao.”
Aidha kiungo huyo, alijikuta akitaitiwa na mashabiki ambao walikuwa na keki ya kumbukumbu ya kuzaliwa ya shabiki wa timu hiyo ambapo alijikuta akiwekwa mtu kati na kupakwa usoni jambo lililomfanya atoke nduki na kurejea kwenye vyumba vya kubadilishia nguo.
Wilbert Molandi, Dar es Salaam
The post Bao la Fei Toto lanunuliwa Yanga appeared first on Global Publishers.
