RC Makonda amesema barabara hiyo ina urefu wa Km 4.3 na itagharimu kiasi cha Shilingi Bilioni 79 hadi kukamilika ikihusisha uwekaji wa Taa za barabarani, Vivuko, Mitaro, Sehemu ya kufanyia mazoezi na eneo la watembea kwa miguu ambapo ujenzi huo unaenda sambamba ujenzi wa Mferegi mkubwa na wakisasa wa kusafirisha maji ya mvua kutoka Shekilango, maeneo yote ya Sinza, Mwenge, Chuo cha Ustawi wa Jamii, Kijitonyama kupitia Mikocheni eneo la Tanesco na kuyapeleka hadi baharini jambo litakalosaidia kumaliza kero ya maji kipindi cha mvua.
Aidha RC Makonda amesema katikati ya barabara hiyo kumeachwa kwaajili ya Barabara ya Mabasi ya Mwendokasi huku akimshukuru Rais Dkt. John Magufuli kwa namna anavyozipatia majibu kero za wakazi wa Dar es salaam.
Pamoja na hayo RC Makonda pia amesema ujenzi wa barabara hiyo utahusisha ujenzi wa Service Road yenye upana wa Mita 6.5 kuingilia Stand mpya ya Mwenge kutokea Bamaga pamoja na kuunganisha barabara za Sinza mapambano, barabara ya nyuma ya chuo cha ustawi wa jamii kutokea barabara ya akachube.
Hata hivyo RC Makonda amesema upanuzi wa barabara ya njia nne kutoka Shekilango hadi Bamaga unatarajiwa kuanza siku yoyote kuanzia sasa kwakuwa fedha zipo.
Katika ziara hiyo RC Makonda ametembelea pia Mradi wa Ujenzi Wa Barabara na Mitaro ya Maji ya Mvua Eneo la Bwawani kata ya Mwananyamala ambalo Kwa muda mrefu wakazi wa eneo hilo wamekuwa wakiteseka na kero ya maji kujaa na kutwama katika makazi yao lakini Kwa sasa wakazi wa eneo hilo wanafurahia barabara nzuri na mitaro ya kisasa ya kupitisha maji.
